ਸਵੱਛ ਭਾਰਤ ਅਭਿਆਨ ਵਿੱਚ ਨੀਰਵ ਮੋਦੀ ਦਾ ਯੋਗਦਾਨ

ss1

ਸਵੱਛ ਭਾਰਤ ਅਭਿਆਨ ਵਿੱਚ ਨੀਰਵ ਮੋਦੀ ਦਾ ਯੋਗਦਾਨ

ਭਾਰਤ ਵਿੱਚ ਸਵੱਛ ਭਾਰਤ ਅਭਿਆਨ ਦੀ ਸ਼ੁਰੂਆਤ ਕਿਸ ਨੇ ਕੀਤੀ ਸੀ ? ਤੁਹਾਡੇ ਕੋਲ ਇਸ ਦਾ ਜਵਾਬ ਦੇਣ ਲਈ ਦੋ ਉੱਤਰ ਹਨ ਪਹਿਲਾ ਨੀਰਵ ਮੋਦੀ ਅਤੇ ਦੂਜਾ ਨਰਿੰਦਰ ਮੋਦੀ।ਜੇਕਰ ਤੁਹਾਡਾ ਜਵਾਬ ਦੂਜਾ ਭਾਵ ਨਰਿੰਦਰ ਮੋਦੀ ਹੈ ਤਾਂ ਤੁਹਾਡਾ ਜਵਾਬ ਬਿਲਕੁਲ ਹੀ ਗਲਤ ਹੈ। ਸੱਚ ਅਤੇ ਤੱਥ ਇਹ ਕਹਿੰਦੇ ਹਨ ਕਿ ਨਰਿੰਦਰ ਮੋਦੀ ਤੋਂ ਪਹਿਲਾਂ ਹੀ ਨੀਰਵ ਮੋਦੀ ਨੇ 2010 ਵਿੱਚ ਸਵੱਛ ਭਾਰਤ ਅਭਿਆਨ ਦੀ ਸ਼ੁਰੂਆਤ ਕਰ ਦਿੱਤੀ ਸੀ। ਖੈਰ ਗਾਂਧੀ ਦਾ ਇਹ ਸੁਪਨਾ ਨੀਰਵ ਮੋਦੀ ਪੂਰਾ ਕਰੇ ਜਾਂ ਨਰਿੰਦਰ ਮੋਦੀ ,ਕੀ ਫਰਕ ਪੈਂਦਾ ।ਆਖਰ ਦੋਹੇਂ ਕੌਮੀ ਭਾਈ ਹੀ ਤਾਂ ਹਨ।ਸਵੱਛਤਾ ਅਭਿਆਨ ਵਿੱਚ ਨੀਰਵ ਮੋਦੀ ਨੇ ਜੋ ਆਪਣਾ ਅਹਿਮ ਯੋਗਦਾਨ ਦਿੱਤਾ,ਉਹ ਵਾਕਾਈ ਹੀ ਤਾਰੀਫ ਦੇ ਕਾਬਲ ਹੈ।ਨਰਿੰਦਰ ਮੋਦੀ ਦਾ ਸਵੱਛਤਾ ਅਭਿਆਨ ਤਾਂ ਸਿਰਫ ਸੈਲਫੀ ਅਭਿਆਨ ਸੀ। ਜਦਕਿ ਅਸਲ ਵਿੱਚ ਦੇਸ਼ ਦੀ ਸਫਾਈ ਤਾਂ ਨੀਰਵ ਭਾਈ ਮੋਦੀ ਨੇ ਕੀਤੀ ਹੈ। ਜਿਸਦਾ ਜਮੀਨੀ ਪੱਧਰ ‘ਤੇ ਜਬਰਦਸਤ ਅਸਰ ਦੇਖਣ ਨੂੰ ਮਿਲਿਆ ਹੈ। ਐਨਾ ਅਸਰ ਹੋਇਆ ਹੈ ਕਿ ਖਬਰਾਂ ਦੇ ਚੈਨਲਾਂ ਨੂੰ ਨੀਰਵ ਮੋਦੀ ਦੇ ਨਾਂਅ ਦਾ ਦੌਰਾ ਹੀ ਪੈ ਗਿਆ। ਨੀਰਵ ਮੋਦੀ ਦੇ ਇਸ ਅਹਿਮ ਯੋਗਦਾਨ ਦੀ ਅਸੀਂ ਜਿੰਨੀ ਵੀ ਤਰੀਫ ਕਰੀਏ ੳਨੀ ਹੀ ਘੱਟ ਹੈ।ਅਤੇ ਉਸ ਦੇ ਇਸ ਕਾਰਨਾਮੇ ਨਾਲ ਕਈ ਬੈਂਕ ੳਪਭੋਗਤਾਵਾਂ ਦੀਆਂ ਅੱਖਾਂ ਖੁਸ਼ੀ ਨਾਲ ਭਿੱਜ ਗਈਆਂ।

ਹੁਣ ਨੀਰਵ ਮੋਦੀ ਦਾ ਨਾਂਅ ਸੁਨਹਿਰੀ ਅੱਖਰਾਂ ਵਿੱਚ ਦੇਸ਼ ਦੇ ਸਫਾਈ ਸੇਵਕਾਂ ਦੀ ਸੂਚੀ ਵਿੱਚ ਲਿਖ ਦਿੱਤਾ ਹੈ।ਇਸ ਲਿਸਟ ਵਿੱਚ ਪਹਿਲਾਂ ਹੀ ਹਰਸ਼ਿਕ ਮਹਿਤਾ ,ਰਾਮਾਲਿੰਗ ਰਾਜੂ,ਵਿਜੇ ਮਾਲਿਆ ਆਦਿ ਦਾ ਨਾਂਅ ਸ਼ਾਮਲ ਹੈ। ਇਹ ਸਭ ਦੇਸ਼ ਦੀ ਸਫਾਈ ਮੁਹਿੰਮ ਦੇ ਬ੍ਰੈਂਡ ਅਬੈਸਡਰ ਹਨ ।ਵੈਸੇ ਵੀ ਭਾਰਤ ਦੀ ਸੰਪਤੀ ਤਾਂ ਰਾਸ਼ਟਰੀ ਸੰਪਤੀ ਹੇ। ਇਸਲਈ ਕਿਹਾ ਜਾਂਦਾ ਹੈ ਕਿ ਲੁੱਟ ਸਕੋ ਤਾਂ ਲੱਟੋ ਅਤੇ ਐਸ਼ ਕਰੋ। ਪਰ ਸ਼ਰਤ ਇਹ ਹੈ ਕਿ ਸੰਸਦ ਵਿੱਚ ਘਾਟੇ ਦਾ ਬਜਟ ਨਾ ਪੇਸ਼ ਕੀਤਾ ਜਾਵੇ। ਵੈਸੇ ਵੀ ਸਾਡੇ ਦੇਸ਼ ਨੂੰ ਤਾਂ ਘਪਲਿਆਂ ਦੀ ਆਦਤ ਹੈ। ਇਸ ਵਿੱਚ ਕੁਝ ਵੀ ਨਵਾਂ ਨਹੀਂ ਹੈ। ਆਜਾਦੀ ਤੋਂ ਬਾਅਦ ਸਾਨੂੰ ਵਿਕਾਸ ਦੇ ਰੂਪ ਵਿੱਚ ਟੋਏ ਅਤੇ ਘਪਲੇ ਹੀ ਤਾਂ ਮਿਲੇ ਹਨ।ਨਾ ਤਾਂ ਭਾਂਰਤ 70 ਸਾਲ ਬਾਅਦ ਸੜਕਾਂ ਦੇ ਟੋਏ ਭਰ ਪਾਏ ਅਤੇ ਨਾਂ ਹੀ ਘਪਲੇ ਹੀ ਰੁੱਕ ਪਾਏ। ਇਸ ਲਈ ਸਾਨੂੰ ਘੋਟਾਲੇ ਹੁੰਦੇ ਦੇਖਣ ਦੀ ਬਜਾਏ ਇਨ੍ਹਾਂ ਟੋਇਆਂ ਵਿੱਚ ਡੁੱਬ ਕੇ ਮਰ ਨਹੀਂ ਜਾਣਾ ਚਾਹੀਦਾ ?ਤਾਂ ਕਿ ਕੁਝ ਤਾਂ ਰਾਸ਼ਟਰ ਨਿਰਮਾਣ ਵਿੱਚ ਆਪਣਾ ਵੀ ਯੋਗਦਾਨ ਹੋਵੇ।ਦਿਲਚਸਪ ਗੱਲ ਇਹ ਹੈ ਕਿ ਲਗਪਗ ਅੱਠ ਸਾਲਾਂ ਤੋਂ ਨੀਰਵ ਮੋਦੀ ਦੇਸ਼ ਨੂੰ ਸਾਫ ਕਰਨ ਲਈ ਵਿੳਂੁਤਬੰਦੀ ਕਰ ਰਿਹਾ ਸੀ। ਅਤੇ ਇਸ ਬਾਰੇ ਕਿਸੇ ਨੂੰ ਕੰਨੋਕੰਨ ਖਬਰ ਨਹੀਂ ਸੀ। ਸੋ ਕਿਸੇ ਨੇ ਧਿਆਨ ਨਹੀਂ ਦਿੱਤਾ।

ਕਿਉਂਕਿ ਅਸੀਂ ਤਾਂ ਅੱਖ ਮਾਰਨ ਵਾਲੀ ਕੁੜੀ ਦੇ ਪਿੱਛੇ ਅੰਨੇ ਸਾਂ।ਅਸੀਂ ਤਾਂ ਇਹ ਜਾਣਨ ਵਿੱਚ ਮਸ਼ਰੂਫ ਸਾਂ ਕਿ ਬਾਹੂਬਲੀ ਨੇ ਕਟੱਪਾ ਨੂੰ ਕਿਉਂ ਮਾਰਿਆ,ਅਯੌਧਿਆ ਵਿੱਚ ਰਾਮ ਮੰਦਿਰ ਬਣੇਗਾ ਜਾਂ ਮਸਜਿਦ ਆਦਿ ਵਿੱਚ ਮਸਤ ਸਾਂ।ਇਸਲਈ ਨੀਰਵ ਮੋਦੀ ਨੇ ਮੌਕਾ ਦੇਖਦੇ ਹੀ ਘੰਟੇ ਦਾ ਪੂਰਾ ਫਾਇਦਾ ਚੁੱਕਦੇ ਹੋਏ ਪੈਸਾ ਲੁੱਟ ਕੇ ਦੇਸ਼ ਨੂੰ ਚਮਤਕਾਰ ਕਰ ਕੇ ਦਿਖਾ ਦਿੱਤਾ। ਅਤੇ ਨਾ ਖਾਉਂਗਾ ਨਾ ਹੀ ਖਾਣ ਦੇਵਾਂਗਾਂ ਕਹਿਣ ਵਾਲੇ ਚੌਂਕੀ ਦਾਰੀ ਕਰਦੇ ਰਹਿ ਗਏ।ਸਾਡੇ ਦੇਸ਼ ਵਿੱਚ ਗਜਬ ਕੇ ਚੌਂਕੀ ਦਾਰ ਹ,ਜਿੰਨਾਂ ਦੇ ਪੈਰ ਆਪਣੇ ਦੇਸ਼ ਵਿੱਚ ਟਿਕਦੇ ਨਹੀਂ ।ਇਸ ਲਈ ਚੋਰੀ ਹੋਣਾ ਤਾਂ ਲਾਜਮੀ ਹੀ ਹੈ। ਅਜਿਹੇ ਵਿੱਚ ਨੀਰਵ ਮੋਦੀ ‘ਤੇ ਦੇਸ਼ ਛੱਡ ਕੇ ਭਗੌੜਾ ਹੋਣ ਦਾ ਕਲੰਕ ਨਹੀਂ ਲਾਉਣਾ ਚਾਹੀਦਾ।ਵੈਸੇ ਵੀ ਫੜਿਆ ਜਾਂਦਾ ਤਾਂ ਸਲਮਾਲ ਖਾਨ ਵਾਂਗ ਬਰੀ ਹੋ ਹੀ ਜਾਣਾ ਸੀ।ਕਿਉਕਿ ਭਾਰਤ ਵਿੱਚ ਘਪਲਿਆਂ ਤੋਂ ਬਾਅਦ ਅੱਜ ਤੱਕ ਸਿਰਫ 24 ਫੀਸਦ ਮਾਮਲਿਆਂ ਵਿੱਚ ਹੀ ਦੋਸ਼ੀਆਂ ਨੂੰ ਸਜਾ ਹੋਈ ਹੈ ਬਾਕੀ ਸਭ ਆਜਾਦ ਘੁੰਮ ਰਹੇ ਹਨ ਅਤੇ ਕੁਝ ਤਾਂ ਵਿਦੇਸ਼ਾਂ ਵਿੱਚ ਮੌਜ਼ ਲੈ ਰਹੇ ਹਨ।

ਹਰਪ੍ਰੀਤ ਸਿੰਘ ਬਰਾੜ
CERTIFIED COUNSELOR
ਸਾਬਕਾ ਡੀ ਓ ,174 ਮਿਲਟਰੀ ਹਸਪਤਾਲ
ਮੇਨ ਏਅਰ ਫੋਰਸ ਰੋਡ,ਬਠਿੰਡਾ

Share Button

Leave a Reply

Your email address will not be published. Required fields are marked *