Sat. Dec 7th, 2019

ਵੀਡੀਓ ਬਣਾਉਣ ਵਾਲਾ ਗੈਂਗ

ਵੀਡੀਓ ਬਣਾਉਣ ਵਾਲਾ ਗੈਂਗ

ਅੱਜਕੱਲ ਵੀਡੀਓ ਬਣਾਉਣ ਵਾਲੇ ਗੈਂਗ ਦਾ ਦਬਦਬਾ ਚਾਰੇ ਪਾਸੇ ਛਾਇਆ ਹੋਇਆ ਹੈ। ਇਸ ਗੈਂਗ ਦਾ ਸਿਰਫ ਇਕੋ ਹੀ ਮਕਸਦ ਹੈ ਵੀਡੀਓ ਬਣਾਓ ਅਤੇ ਫੇਸਬੁੱਕ ਜਾਂ ਵਹਾੱਟਸਐਪ ‘ਤੇ ਭੇਜ ਕੇ ਜਿਆਦਾ ਤੋਂ ਜਿਆਦਾ ਲਾਈਕਸ ਵਾਲੇ ਅੰਗੂਠੇ ਕਮਾਓ।ਇਸ ਲਈ ਜਿੱਥੇ ਕਿਤੇ ਵੀ ਕੋਈ ਪਾਣੀ ਵਿੱਚ ਡੁੱਬ ਰਿਹਾ ਹੋਵੇ, ਅੱਗ ਵਿੱਚ ਝੁਲਸ ਰਿਹਾ ਹੋਵੇ, ਜਾਂ ਫਿਰ ਫਾਂਸੀ ਦੇ ਰੱਸੇ ‘ਤੇ ਲਟਕਾਉਣ ਲਈ ਜਾਂਦਾ ਹੋਇਆ ਮਿਲੇ, ਉਥੇ ਇਹ ਗੈਂਗ ਪਹਿਲਾਂ ਹੀ ਹਾਜ਼ਰ ਹੋਕੇ ਬੜੀ ਸ਼ਿੱਦਤ ਨਾਲ ਵੀਡੀਓ ਬਣਾਉਣ ਵਿੱਚ ਲੱਗ ਜਾਂਦਾ ਹੈ। ਮਰਦਾ ਹੌਇਆ ਵਿਅਕਤੀ ਇਸ ਗੈਂਗ ਨੂੰ ਅਰਜ਼ ਕਰਦੇ ਹੋਏ ਕਹਿੰਦਾ ਹੈ ਮੈਂ ਡੁੱਬ ਰਿਹਾ ਹਾਂ ਮੈਂਨੂੰ ਬਚਾਓ ਓ ਭਲੇ ਮਾਨਸੋ ਮੈਂ ਅੱਗ ਦੀਆਂ ਲਪਟਾਂ ਵਿੱਚ ਝੁਲਸ ਰਿਹਾ ਹਾਂ ਤਰਸ ਖਾਓ ਅਤੇ ਮੈਂਨੂੰ ਬਚਾਓ।ਪਰ ਇਹ ਗੈਂਗ ਥੋੜਾ ਜਿਹਾ ਵੀ ਦਰਦ ਮਹਿਸੂਸ ਕੀਤੇ ਬਿਨਾਂ ਆਪਣੇ ਮਕਸਦ ਨੂੰ ਪੂਰਾ ਕਰਨ ਲਈ ਡਟਿਆ ਰਹਿੰਦਾ ਹੈ।

  ਇਸ ਗੈਂਗ ਦਾ ਮੰਨਣਾ ਹੈ ਕਿ ਅੱਜਕੱਲ ਇਸ ਤਰ੍ਹਾਂ ਦੀਆਂ ਵੀਡੀਓਜ਼ ਦੀ ਫੇਸਬੁੱਕ ‘ਤੇ ਬਹੁਤ ਜਿਆਦਾ ਮੰਗ ਹੈ।ਅਜਿਹੀਆਂ ਵੀਡੀਓਜ਼ ਦੇ ਅੱਪਲੋਡ ਹੁੰਦੇ ਹੀ ਧੜਾਧੜ ਲਾਈਕਸ ਦਾ ਮੀਂਹ ਵਰ੍ਹਣ ਲੱਗਦਾ ਹੈ। ਜਨਤਾ ਵੀ ਇਨ੍ਹਾਂ ਨੂੰ ਅਸਲੀ ਹੀਰੋ ਮੰਨ ਕੇ ਇਨ੍ਹਾਂ ਦੀ ਬਹਾਦਰੀ ਅੱਗੇ ਲਾਈਕਸ ਦੇ ਰੂਪ ਵਿੱਚ ਮੱਥਾ ਟੇਕਣ ਦਾ ਕੰਮ ਬਾਖੂਬੀ ਕਰਦੀ ਹੈ। ਇਸ ਨਾਲ ਗੈਂਗ ਦੇ ਮੈਂਬਰਾਂ ਦੀ ਇੱਜਤ ਵਿੱਚ ਇਜ਼ਾਫਾ ਹੋਣ ਲੱਗਦਾ ਹੈ। ਜੇਕਰ ਗੈਂਗ ਦੇ ਇਹੋ ਮੈਂਬਰ ਮਰਦੇ ਹੋਏ ਬੰਦੇ ਦੀ ਵੀਡੀਓ ਬਣਾਉਣ ਤਾਂ ਲੋਕ ਦੇਖਣਾ ਪਸੰਦ ਨਹੀਂ ਕਰਦੇ। ਕੋਈ ਲਾਈਕ ਵੀ ਨਹੀਂ ਕਰਦਾ। ਇਸੇ ਲਈ ਇਹ ਗੈਂਗ ਖਤਰਨਾਕ ਵੀਡੀਓਜ਼ ਦੀ ਤਲਾਸ਼ ਵਿੱਚ ਐਧਰ ਉਧਰ ਘੁੰਮਦਾ ਨਜਰ ਆਉਂਦਾ ਹੈ।ਯਮਰਾਜ ਦੇ ਝੋਟੇ ਅਤੇ ਇਨ੍ਹਾਂ ਗੈਂਗ ਮੈਂਬਰਾਂ ਵਿੱਚ ਕੋਈ ਬਹੁਤਾ ਫਰਕ ਨਹੀਂ ਹੈ। ਅਸਲ ਗੱਲ ਇਹ ਹੈ ਕਿ ਇਹ ਗੈਂਗ ਬੇਰੋਜਗਾਰ ਹੈ। ਇਨ੍ਹਾਂ ਕੋਲ ਕੋਈ ਕੰਮਧੰਧਾ ਨਹੀਂ ਹੈ। ਇਸ ਲਈ ਇਨ੍ਹਾਂ ਨੇ ਵੀਡੀਓਜ਼ ਬਣਾਉਣ ਦਾ ਨਵਾਂ ਕੰਮ ਸ਼ੁਰੂ ਕਰ ਦਿੱਤਾ ਹੈ।

ਖਾਲੀ ਦਿਮਾਗ ਸ਼ੈਤਾਨ ਦਾ ਘਰ ਦੀ ਕਹਾਵਤ ਨੂੰ ਸਿੱਧ ਕਰਦਿਆਂ ਇਸ ਗੈਂਗ ਨੇ ਮਰਿਆਦਾਵਾਂ ,ਸੰਵੇਦਨਾਵਾਂ ਅਤੇ ਲੋਕ ਲਾਜ ਨੂੰ ਨਜ਼ਰ ਅੰਦਾਜ ਕਰ ਰੱਖਿਆ ਹੈ। ਅਜਾਦੀ ਤੋਂ ਬਾਅਦ ਆਈ ਮੋਬਾਇਲ ਕ੍ਰਾਤੀ ਤੋਂ ਉਪਜੀ ਵੀਡੀਓ ਕ੍ਰਾਂਤੀ ਨੇ ਅੱਜ ਲੋਕਾਂ ਦੀ ਸ਼ਾਂਤੀ ਭੰਗ ਕਰ ਦਿੱਤੀ ਹੈ। ਹੁਣ ਦੁਨੀਆਂ ਦੀਆਂ ਵੱਡੀਆਂ ਜੰਗਾ ਵੀ ਵੀਡੀਓ ਰਾਹੀਂ ਲੜੀਆਂ ਜਾ ਰਹੀਆਂ ਹਨ। ਦੇਸ਼ ਭਗਤ ਹੋਣ ਦੇ ਮਾਇਨੇ ਬਦਲ ਗਏ ਹਨ। ਹੁਣ ਸਰਹੱਦ ‘ਤੇ ਗੋਲੀ ਖਾਣ ਵਾਲਾ ਘੱਟ ਅਤੇ ਵੀਡੀਓ ਵਿੱਚ ਵੰਦੇਮਾਤਰਮ ਅਤੇ ਭਾਰਤ ਮਾਤਾ ਦੀ ਜੈ ਕਹਿਣ ਵਾਲਾ ਵੱਡਾ ਦੇਸ਼ਭਗਤ ਮੰਨਿਆ ਜਾਣ ਲੱਗਿਆ ਹੈ। ਵੀਡੀਓ ਬਣਾਉਣ ਦੀ ਇਹ ਜਿੱਦ ਅਜਿਹੀ ਹੈ ਕਿ ਲੋਕਾਂ ਨੇ ਘਰ ਦੀ ਰਸੋਈ ਤੋਂ ਲੈਕੇ ਗੁਸਲਖਾਨੇ ਤੱਕ ਦੀਆ ਵੀਡੀਓਜ਼ ਬਣਾ ਦਿੱਤੀਆਂ ਹਨ। ਇਕ ਵੀਡੀਓ ਜਿੰਦਗੀ ਸਵਾਰ ਰਹੀ ਹੈ ਤਾਂ ਦੂਜੀ ਵੀਡੀਓ ਵਿਗਾੜ ਰਹੀ ਹੈ। ਪੂਰੀ ਦੁਨੀਆਂ ਵੀਡੀਓ ਦੇ ਅੰਦਰ ਸਿਮਟਦੀ ਜਾ ਰਹੀ ਹੈ। ਵਿਕਾਸ ਵੀ ਵੀਡੀਓ ਦੇ ਅੰਦਰ ਹੀ ਹੋ ਰਿਹਾ ਹੈ।ਯਥਾਰਥ ਹੁੱਣ ਤੱਥਾਂ ਤੋਂ ਦੂਰ ਅਤੇ ਖਾਮੋਸ਼ ਹੈ।

ਹਰਪ੍ਰੀਤ ਸਿੰਘ ਬਰਾੜ
CERTIFIED COUNSELOR
ਸਾਬਕਾ ਡੀ ਓ ,174 ਮਿਲਟਰੀ ਹਸਪਤਾਲ
ਮੇਨ ਏਅਰ ਫੋਰਸ ਰੋਡ,ਬਠਿੰਡਾ

Disclaimer

We do not guarantee/claim that the information we have gathered is 100% correct. Most of the information used in articles are collected from social media and from other Internet sources. If you feel any offense regarding Information and pictures shared by us, you are free to send us a message below that blog post. We will act immediately and delete that offensive thing.

Leave a Reply

Your email address will not be published. Required fields are marked *

%d bloggers like this: