Sun. Aug 18th, 2019

ਬੀ.ਟੀ. ਕਪਾਹ ਦੀ ਕੀਮਤ ‘ਚ ਕਟੌਤੀ

ਬੀ.ਟੀ. ਕਪਾਹ ਦੀ ਕੀਮਤ ‘ਚ ਕਟੌਤੀ

ਨਵੀਂ ਦਿੱਲੀ : ਕੇਂਦਰ ਸਰਕਾਰ ਨੇ ਰਾਇਲਟੀ ਫੀਸ ਘਟਾ ਕੇ ਬੀ.ਟੀ. ਕਪਾਹ ਦੇ ਬੀਜਾਂ ਦੀ ਕੀਮਤ ਵਿਚ ਕਟੌਤੀ ਕਰ ਦਿੱਤੀ ਹੈ। ਜਿਸ ਨਾਲ ਦੇਸ਼ ਭਰ ਵਿਚ ਖੇਤੀ ਕਰਨ ਵਾਲੇ ਲਗਭਗ 80 ਲੱਖ ਕਿਸਾਨਾਂ ਨੂੰ ਫਾਇਦਾ ਹੋ ਸਕਦਾ ਹੈ।

ਖੇਤੀਬਾੜੀ ਮੰਤਰਾਲੇ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਮੁਤਾਬਕ ਕਿਸਾਨਾਂ ਨੂੰ ਹੁਣ ਬੀ.ਟੀ. ਕਪਾਹ ਦੇ 450 ਗ੍ਰਾਮ ਵਾਲੇ ਪੈਕਟ ਲਈ ਵੱਧ ਤੋਂ ਵੱਧ 730 ਰੁਪਏ ਖਰਚ ਕਰਨੇ ਪੈਣਗੇ, ਜਿਸ ਦੀ ਕੀਮਤ ਪਹਿਲਾਂ 740 ਰੁਪਏ ਸੀ।

ਸਰਕਾਰ ਨੇ ਰਾਇਲਟੀ ਫੀਸ ‘ਚ 49 ਫੀਸਦੀ ਦੀ ਕਮੀ ਕੀਤੀ ਹੈ। ਸੀਜ਼ਨ 2018-2019 ਵਿਚ ਬੋਲਗਾਰਡ-2 ਬੀਟੀ ਕਪਾਹ ਦੀ ਕੀਮਤ ‘ਚ 39 ਰੁਪਏ ਦੀ ਰਾਇਲਟੀ ਫੀਸ ਸ਼ਾਮਿਲ ਸੀ, ਜੋ ਹੁਣ ਘਟਾ ਕੇ 20 ਰੁਪਏ ਕਰ ਦਿੱਤੀ ਗਈ ਹੈ। ਇਹ ਉਹ ਫੀਸ ਹੈ ਜੋ ਘਰੇਲੂ ਫਰਮਾਂ  ਨੂੰ ਜੀ.ਐਮ. ਕਿਸਮ ਬਣਾਉਣ ਵਾਲੇ ਨਿਰਮਾਤਾਵਾਂ ਨੂੰ ਚੁਕਾਉਣੀ ਪੈਂਦੀ ਹੈ।

ਲਗਾਤਾਰ ਦੂਜੇ ਸਾਲ ਇਹ ਫੀਸ ਘੱਟ ਕੀਤੀ ਗਈ ਹੈ। ਕਪਾਹ ਦੀ ਖੇਤੀ ਜੂਨ ਮਹੀਨੇ ਤੋਂ ਬਾਅਦ ਹੁੰਦੀ ਹੈ। ਬੀਜ ਸਸਤੇ ਹੋਣ ਨਾਲ ਕਿਸਾਨਾ ਨੂੰ ਰਾਹਤ ਮਿਲੇਗੀ। ਉੱਥੇ ਹੀ ਰਾਇਲਟੀ ਫੀਸ ਘੱਟ ਹੋਣ ਕਾਰਨ ਇਸ ਦੇ ਨਿਰਮਾਤਾ ਨਿਰਾਸ਼ ਹਨ ਕਿਉਂਕਿ  ਉਹਨਾਂ ਦਾ ਮੁਨਾਫਾ ਘੱਟ ਹੋਵੇਗਾ।

ਕੇਂਦਰ ਨੇ ਪਹਿਲੀ ਵਾਰ 2016-2017 ‘ਚ ਬੀ.ਟੀ. ਕਪਾਹ ਬੀਜਾਂ ਦੀ ਕੀਮਤ 830-1030 ਰੁਪਏ ਘਟਾ ਕੇ ਪ੍ਰਤੀ ਪੈਕਟ 800 ਰੁਪਏ ਕਰ ਦਿੱਤੀ ਸੀ। ਬਹੁਰਾਸ਼ਟਰੀ ਬੀਜ ਕੰਪਨੀਆਂ ਵੱਲੋਂ ਇਸ ਕਦਮ ਦੀ ਬਹੁਤ ਅਲੋਚਨਾ ਕੀਤੀ ਗਈ ਸੀ। ਮੋਨਸੈਂਟੋ ਨੇ ਭਾਰਤ ‘ਚ ਆਪਣੇ ਕਾਰੋਬਾਰ ਦਾ ਮੁੜ ਮੁਲਾਂਕਣ ਕਰਨ ਦੀ ਚੇਤਾਵਨੀ ਦੇ ਦਿੱਤੀ ਸੀ। ਉਸ ਨੇ ਇਸ ਖਿਲਾਫ ਦਿੱਲੀ ਹਾਈ ਕੋਰਟ ਵਿਚ ਪਟੀਸ਼ਨ ਵੀ ਦਰਜ ਕੀਤੀ ਸੀ।

ਜ਼ਿਕਰਯੋਗ ਹੈ ਕਿ ਕਈ ਕਿਸਾਨ ਸੰਗਠਨਾਂ ਨੇ ਬੀ.ਟੀ. ਕਪਾਹ ਬੀਜਾਂ ਦੀ ਕੀਮਤ ਘੱਟ ਕਰਨ ਦੀ ਮੰਗ ਕੀਤੀ ਸੀ। ਉਹਨਾਂ ਦੀ ਮੰਗ ਸੀ ਕਿ ਕਿਸਾਨਾਂ ‘ਤੇ ਬੇਲੋੜਾ ਬੋਝ ਨਾ ਪਵੇ। ਸਰਕਾਰ ਇਸ ‘ਤੇ 2016-17 ਤੋਂ ਕਦਮ ਚੁੱਕ ਰਹੀ ਹੈ। 2016-17 ‘ਚ ਜੋ ਵਿਸ਼ੇਸ਼ ਫੀਸ 49 ਰੁਪਏ ਸੀ, ਹੁਣ ਉਹ ਘੱਟ ਕੇ 29 ਰੁਪਏ ਰਹਿ ਗਈ ਹੈ।

Leave a Reply

Your email address will not be published. Required fields are marked *

%d bloggers like this: