“ਆਤਮ ਰੰਗ” ਦੇ ਸੰਪਾਦਕ ਭਾਈ ਸਤਨਾਮ ਸਿੰਘ ਸਦੀਵੀ ਵਿਛੋੜਾ ਦੇ ਗਏ
“ਆਤਮ ਰੰਗ” ਦੇ ਸੰਪਾਦਕ ਭਾਈ ਸਤਨਾਮ ਸਿੰਘ ਸਦੀਵੀ ਵਿਛੋੜਾ ਦੇ ਗਏ
ਹਰਦਮ ਮਾਨ
ਸਰੀ, 14 ਜਨਵਰੀ 2021- ਮਾਸਿਕ “ਆਤਮ ਰੰਗ” ਦੇ ਸੰਪਾਦਕ ਅਤੇ ਭਾਈ ਸਾਹਿਬ ਭਾਈ ਰਣਧੀਰ ਸਿੰਘ ਟਰੱਸਟ ਦੇ ਟਰੱਸਟੀ ਭਾਈ ਸਤਨਾਮ ਸਿੰਘ ਸੰਖੇਪ ਬਿਮਾਰੀ ਬਾਅਦ 82 ਸਾਲ ਦੀ ਉਮਰ ਭੋਗ ਕੇ ਸਦੀਵੀ ਵਿਛੋੜਾ ਦੇ ਗਏ। ਆਪ ਅਖੰਡ ਕੀਰਤਨੀ ਜਥਾ ਚੰਡੀਗੜ੍ਹ ਦੇ ਮੁੱਖ ਸੇਵਾਦਾਰ ਸਨ। ਕੱਲ੍ਹ 13 ਜਨਵਰੀ ਦਿਨ ਨੂੰ ਉਨ੍ਹਾਂ ਦਾ ਅੰਤਿਮ ਸਸਕਾਰ ਵਿਖੇ ਕਰ ਦਿੱਤਾ ਗਿਆ।
ਭਾਈ ਸਤਨਾਮ ਸਿੰਘ ਲੰਮਾ ਸਮਾਂ ਪੰਜਾਬ ਦੇ ਖੇਤੀ ਬਾੜੀ ਵਿਭਾਗ, ਚੰਡੀਗੜ੍ਹ ਵਿਚ ਬਤੌਰ ਸਹਾਇਕ, ਫਿਰ ਸੁਪਰਡੈਂਟ, ਫਿਰ ਪ੍ਰਬੰਧਕੀ ਅਫਸਰ ਰਹੇ ਅਤੇ 13 ਮਾਰਚ 1997 ਨੂੰ ਸਪੈਸ਼ਲ ਸੈਕਟਰੀ ਦੇ ਪਦ ਤੋਂ ਰਿਟਾਇਰ ਹੋਏ ਸਨ। ਆਪ ਨੇ ਲੰਮਾ ਸਮਾਂ “ਆਤਮ ਰੰਗ” ਦੇ ਮੈਨੇਜਰ ਦੀ ਸੇਵਾ ਕੀਤੀ। ਆਤਮ ਰੰਗ ਦੇ ਸੰਪਾਦਕ ਪ੍ਰਿੰਸੀਪਲ ਗੁਰਮੁਖ ਸਿੰਘ ਦੀ ਸੇਵਾ ਮੁਕਤੀ ਤੋਂ ਬਾਅਦ ਆਪ ਇਸ ਦੀ ਨਿਰੰਤਰ ਸੰਪਾਦਨਾ ਦੀ ਸੇਵਾ ਕਰ ਰਹੇ ਸਨ। ਆਪ ਆਪਣੇ ਪਿੱਛੇ ਧਰਮ ਪਤਨੀ ਬੀਬੀ ਕੁਲਵੰਤ ਕੌਰ, ਪੁੱਤਰ ਮਨਪ੍ਰੀਤ ਸਿੰਘ ਤੇ ਪੁੱਤਰੀ ਮਨਿੰਦਰ ਕੌਰ ਤੇ ਹੱਸਦਾ ਵਸਦਾ ਪਰਿਵਾਰ ਛੱਡ ਗਏ ਹਨ।
ਉਨ੍ਹਾਂ ਦੇ ਵਿਛੋੜੇ ਤੇ ਹਰਦਰਨ ਮੈਮੋਰੀਅਲ ਇੰਟਰਨੈਸ਼ਨਲ ਟਰੱਸਟ ਕੈਨੇਡਾ ਦੇ ਬਾਨੀ ਸ: ਜੈਤੇਗ ਸਿੰਘ ਅਨੰਤ ਨੇ ਦੁੱਖ ਪ੍ਰਗਟ ਕਰਦਿਆਂ ਉਨ੍ਹਾਂ ਦੀ ਪਿਛਲੀ ਅੱਧੀ ਸਦੀ ਦੀ ਦੇਣ ਤੇ ਉਨ੍ਹਾਂ ਦੇ ਪੰਥਕ ਜਜ਼ਬੇ ਨੂੰ ਸਿਜਦਾ ਕੀਤਾ। ਭਾਈ ਸਾਹਿਬ ਭਾਈ ਰਣਧੀਰ ਸਿੰਘ ਟਰੱਸਟ ਯੂ.ਕੇ. ਦੇ ਮੋਢੀ ਭਾਈ ਜੁਝਾਰ ਸਿੰਘ ਨੇ ਭਾਈ ਸਤਨਾਮ ਸਿੰਘ ਦੇ ਵਿਛੋੜੇ ‘ਤੇ ਕਿਹਾ ਕਿ ਉਹ ਇਕ ਸਮਰਪਿਤ ਭਾਵਨਾ ਵਾਲੇ ਗੁਰਿਸੱਖ ਸਨ। ਅਮਰੀਕਾ ਤੋਂ ਭਾਈ ਤਾਰਾ ਸਿੰਘ ਕੈਲੀਫੋਰਨੀਆ, ਭਾਈ ਗੁਰਪ੍ਰੀਤ ਸਿੰਘ ਨਿਊ ਜਰਸੀ, ਇੰਗਲੈਂਡ ਤੋਂ ਭਾਈ ਭੁਪਿੰਦਰ ਸਿੰਘ ਬੇਦੀ, ਭਾਈ ਤਰਲੋਚਨ ਸਿੰਘ, ਭਾਈ ਜਸਬੀਰ ਸਿੰਘ, ਕੈਨੇਡਾ ਤੋਂ ਭਾਈ ਗੁਰਮੀਤ ਸਿੰਘ ਬੌਬੀ, ਪੰਜਾਬ ਤੋਂ ਭਾਈ ਆਰ ਪੀ ਸਿੰਘ ਮੁਹਾਲੀ, ਭਾਈ ਸੁਰਿੰਦਰ ਸਿੰਘ ਮੋਹਾਲੀ, ਗੁਰਦੀਪ ਸਿੰਘ ਅੰਮ੍ਰਿਤਸਰ, ਡਾ. ਸਰਬਜੋਤ ਕੌਰ ਲੁਧਿਆਣਾ ਨੇ ਵੀ ਉਨ੍ਹਾਂ ਦੇ ਸਦੀਵੀ ਵਿਛੋੜੇ ਉਪਰ ਡੂੰਘੇ ਦੁੱਖ ਦਾ ਇਜ਼ਹਾਰ ਕੀਤਾ ਹੈ।
